ქართველი დიპლომატი, მწერალი, პუბლიცისტი, მთარგმნელი, პედაგოგი, მუსიკოსი და ტელეწამყვანი გელა ჩარკვიანი 82 წლის ასაკში გარდაიცვალა. აღნიშნულ ინფორმაციას მისი შვილი ავრცელებს.
„გარდაგვეცვალა ჩემი უსაყვარლესი და უძვირფასესი მამა. ჩვენც და ქვეყანამაც დაკარგა გამორჩეული ადამიანი – გელა ჩარკვიანი. პანაშვიდი დღეს და ხვალ, პეკინის 14-ში. გასვენება ხუთშაბათს, 2 საათზე სახლიდან“ – წერს თეონა ჩარკვიანი.
გელა ჩარკვიანს ბოლო პერიოდში ჯანმრთელობის პრობლემები ჰქონდა.
გელა ჩარკვიანი 1939 პირველ მარტს თბილისში დაიბადა. მისი მამა კანდიდ ჩარკვიანი საქართველოს კომუნისტური პარტიის ცენტრალურ კომიტეტის პირველი მდივანი იყო, დედა კი ოფთალმოლოგი – თამარ ჯაოშვილი.
გელა ჩარკვიანმა 1957 წელს დაამთავრა მოსკოვის 56-ე საშუალო სკოლა და სწავლა განაგრძო საქართველოს პოლიტექნიკური ინსტიტუტის სამშენებლო ფაკულტეტის არქიტექტურის განყოფილებაზე. ის ასევე სწავლობდა ჭავჭავაძის სახელობის უცხო ენათა ინსტიტუტში და აშშ-ში – მიჩიგანის უნივერსიტეტში.
გელა ჩარკვიანის კარიერა საქართველოს ტელევიზიიდან იწყება, სადაც 1976 წლიდან 1994 წლამდე მიჰყავდა საავტორო გადაცემა – “გლობუსი”. ათწლეულების განმავლობაში კითხულობდა ლექციებს ინგლისურ ენასა და სოციოლოგიაში თბილისის უცხო ენათა ინსტიტუტსა და თბილისის სახელმწიფო უნივერსიტეტში.
1984 წლიდან 1992 წლამდე საქართველოს კულტურულ ურთიერთობათა ვიცეპრეზიდენტი იყო.
გელა ჩარკვიანი საქართველოს პრეზიდენტის ედუარდ შევარდნაძის მრჩეველი იყო საგარეო საქმეთა საკითხებში, ხოლო მიხეილ სააკაშვილის პრეზიდენტობის დროს, 2005-2006 წლებში იყო მისი თანაშემწე და პრესსპიკერ. 2006 წლიდან დიდ ბრიტანეთსა და ირლანდიაში საქართველოს წარმომადგენელი, ხოლო შემდეგ – ელჩი. მან დიპლომატიური საქმიანობა 2011 წელს შეწყვიტა.
გელა ჩარკვიანი დაინტერესებული იყო მუსიკით. მას რამდენიმე მუსიკალური ნამუშევარი აქვს შექმნილი, ასევე 2001 წელს გამოიცა მისი საპორტეპიანო მინიატურების CD. შექმნილი აქვს როკ-ოპერა “ნარგიზა”. ასევე, ჩარკვინმა თანამედროვე ქართულ ენაზე თარგმნა შექსპირის “მეფე ლირი”.
სიცოცხლის ბოლო წლებში ძირითადად დაკავებული იყო წიგნების წერითა და საჯარო ლექციებით. გელა ჩარკვიანს გამოცემული აქვს წიგნები: “ინტერვიუ მამასთან” ; “ნაგერალა” “ნაგერალა 2”, “ნაგერალა 80” და “ნაცნობ ქიმერათა ფერხული”; “მერმისის ჭაღარა მთვარეები” ; “ENGLISH – როგორ ვისწავლე და როგორ ვასწავლიდი”.
გელა ჩარკვიანს ჰყავდა მეუღლე ნანა თოიძე და ორი შვილი ირაკლი და თეონა ჩარკვიანები.
